Die Trouklokke Klink op KykNet
Bruilof is die
splinternuwe leefstyl program wat Suid-Afrika se wêreldklas
trouindustrie onder die vergrootglas plaas. In die eerste seisoen
besoek aanbieders Louise de Nysschen en Jacinda Louw-Schutte
asemrowende en gesogte venues in die hartjie van die wynland, aan die
weskus en regoor ons pragtige land. In hul hemelhoë hakke loop hulle
die trouwêreld plat en bestudeer die jongste dekor neigings, kry
nuttige wenke by die industrie se top troubeplanners, paradeer in
sprokiesagtige trourokke rond en help so bruidspare om hul volmaakte
troudag tot in die fynste detail te beplan.
In die loots-episode
wat op 7 Augustus op KykNet begin speel, kuier Louise by bekroonde
trourok ontwerper Elizabeth Stockenstrom se ateljee en bewonder van
die besonderse skeppings in haar vertoonvenster. Mede-aanbieder
Jacinda gesels met Uwe Koeter se Johan Louw oor verloofringe en deel
wenke wat duur foute kan voorkom. Christine Meintjies verruil haar
plek agter die kamera vir ‘n kolletjie in die kalklig langs Louise
om die moets en moenies van troufotografie te bespreek, terwyl Kanya
Hunt ‘n verskeidenheid van haar ryk en dekadente troukoeke ten
toonstel – amper te mooi om te eet, maar net te aanloklik vir
Jacinda om te weerstaan. Finansiële guru Anria van Heerden deel 'n
paar goue begrotingswenke en die program sluit af by Webersbrug –
een van die wynland se pêrels en ‘n gewilde venue onder bruidspare
en troubeplanners.
Die reeks is die
breinkind van regisseur Dewet van Rooyen en sy gedugte span by
Mandelbrot Studios. Die idee is gebore uit jare se ervaring in
trouvideografie en kaste vol argiefmateriaal. Toe Bruilof
oorspronklik as ‘n Engelse reeks, ‘Down the Aisle’, aan MNet
voorgelê is, was die paneel stomgeslaan en is dit daar en dan
besluit dat die reeks op KykNet uitgesaai sal word – die enigste
Afrikaanse program in sy soort. Paartjies wat ‘n troue beplan sal
ook dadelik die naam van die hoofborg herken: Trou Inspirasie – ‘n
Afrikaanse trouwebtuiste wat bruide idees vir hul mooiste dag gee, in
hul moedertaal.
Ontmoet die aanbieders…
Jacinda
Louw-Schutte
Jacinda is ‘n
bekende gesig op Suid-Afrikaanse televisie, tydskif-voorblaaie en
loopplanke. Oor die afgelope jare het sy TV-verskynings gemaak op
programme soos Kwêla, Pasella, Om die Wêreld, Morning Live en Top
Billing en was tot onlangs ‘n aanbieder op Ultra Simple Golf op
Supersport 1. Toe sy in 2006 die eindrondte van Survivor SA haal, het
sy deur en deur bewys sy is veel meer as net ‘n beeldskone
gesiggie, en met genoegsame huweliks- en ouerskap kennis in haar
aktetas, is Jacinda beslis ‘n kosbare aanwins vir die Bruilof-span.
Louise de
Nysschen
Louise het haar
deurbraak tot die filmindustrie gemaak met haar rol as die naïewe
rykmansdogter Jesse in die Afrikaanse rolprent Liefling. Hier het die
filmgogga haar stewig beet gepak en so is sy agter die skerms van
Bakgat 2 in as bemarkingskoördineerder. Die volgende keep op haar
kerfstok was die rol van Katja Steenkamp in die gewilde TV-sepie
Generations. In 2012 het sy die knoop met haar heel beste vriend
deurgehaak, en met terugkeer van haar wittebrood het sy feitlik
reguit van die vliegtuig op die Bruilof stel geklim.
Anria van Heerden
Anria het haar TV
debuut in Reise en Soetkyse gemaak en is deesdae bekend as die sjiek
en avontuurlustige motorfietsmeisie op KykNet se Woema. Anria besit
al sedert 1998 haar eie finansiële adviseurs praktyk en is al vir 13
jaar gelukkig getroud. In seisoen 1 van Bruilof deel sy kosbare
insigte en advies vir die troudag en haar finansiële kennis is
sonder twyfel iets waarby bruidspare asook getroude paartjies sal
baat vind.
Hannes Loubser
Hannes Loubser is
die Kreatiewe Direkteur van Wedding Concepts en ‘n reus in die
trou-bedryf. Sedert hy in 2007 by díe internasionaal bekende
trou-koördinerings maatskappy aangesluit het, het hy ‘n wêreld se
kennis in gepalm en spoedig sy pad oopgewerk tot een van die mees
gesogte troubeplanners in die industrie. Na hy in sy hoedanigheid as
Wedding Concepts se trou-guru die Bruilof span vir ‘n ses geslaan
het, is hy gevra om gasaanbieder te speel vir die res van die
seisoen.
Bruilof word
vanaf 7 Augustus 2012 om 21:30 op KykNet (kanaal 111) uitgesaai.
No comments:
Post a Comment